Wienerlied DORNBACHER HETZ

(©F.Bilik 1937-1983)

Hörts ma do auf, des Protestier`n is mir verhasst,
Weil´s viel bequemer is, wanns d´all´s beim Alten lasst,
Halts des Mundwerk so wie mir zu jeder Zeit;
Mir hab´n´s bei d´Nazi g´halten und so halt ma´s heut.

Mir hab´n nix g´wusst und war´n hamlich eh dagegn,
Na, und für die Arbeitslosen war die Zeit a Seg´n,
Schließlich hat ma damals Autobahnen baut,
Dass ma unser Luft no heut´damit versaut.

Vom Kriag derzähl´n ma gern, tan uns gern reden hör´n,
Weil ma so bald net wieder an derleben werd´n,
Mir hab´n a dicke Haut, des is scho nimmer sche´,
Weil s´so dick is, könn´ma gar ohne Rückgrat a no steh´.

Mir san im Werkel drin, wer braucht an tiefer´n Sinn?
San charakterlich guat ´polstert mit an Doppelkinn,
Mir hab´n die West´n rein, des G´wissen nie beschmutzt,
Mir hab´n´s anfach überhaupt gar nie benutzt.

Tan uns nie laut beklag´n, weil mir an Saumag´n habn´n,
Mir san Patridioten, was ´n Gamsbart innen trag´n,
Net aus der Ruah uns bringt, was a zum Himmel stinkt,
Weil´s die Speckschicht uns´rer Vorurteile anfach net durchdringt.

Hörts ma doch auf, die Protestiererei is mir verhasst,
Weil´s viel bequemer is, wanns d´all´s beim Alten lasst,
Halts do des Mundwerk so wie mir zu jeder Zeit,
Mir hab´n´s bei´d Nazi g´halten und so halt ma´s heut´.

Die Studenten soll´n do net demonstrier´n,
Die soll´n statt z´Nachdenken liaber studier´n,
Wanns´´s net um unser Steuergeld erziagerten,
Rechn´t´s nach, was ma drum an Vierteln kriagerten.

Es g´hört a Hitler her statt der Demokrazie,
Weil Leut´wia uns vergisst er a bei der Euthanasie,
Des Volk empfind´t ja g´sund durch sein´ Gedächtnisschwund,
Es bewältigt jede Zeit, a die Mitvergangenheit.

Ja, mir san fesch und resch, na wo is scho Bangladesch,
Und aus dem Osten kummt ja eh nur LSD und Häsch,
Protestideen verdrängt, wer drin im Werkel hängt,
Weil ma durch sei Arbeit ja überhaupt net denkt.

Mir wohnen hinterm Berg und des is unser Stärk´,
Geg´n d´blauen Amasen da hilft uns scho der Gartenzwerg,
Mir hab´n d´Probleme g´löst, mir kürzen den Protest,
Wann ma den "Tee" wegga lasst, bleibt vom Protest anfach "Prost !"